கோட்டாபயவை வீட்டுக்கு அனுப்பி இன்றுடன் 2 வருடங்கள்!
பொது மக்களின் தொடர் போராட்டம் காரணமாக இந்நாட்டின் நிறைவேற்று ஜனாதிபதியான கோட்டாபய ராஜபக்சவை பதவி விலகக் கோரி ஆரம்பித்த “கோட்டா கோ ஹோம்“ அரகலய மூலம் பெற்ற வெற்றிக்கு இன்றுடன் இரு வருடங்கள் பூர்த்தியடைகின்றன.
2019ஆம் ஆண்டின் இறுதிப் பகுதியில் இலங்கையில் இடம்பெற்ற ஜனாதிபதித் தேர்தலில் கோட்டாபய ராஜபக்ச 69 இலட்சம் எனும் அதிக வாக்குகளால் வெற்றிபெற்றார்.
அதன்பின்னர் இடம்பெற்ற பொதுத் தேர்தலிலும் நாடாளுமன்றத்தில் பெரும்பான்மையான ஆசனங்களை வென்று ஸ்ரீலங்கா பொதுஜன பெரமுன ஆட்சியையும் கைப்பற்றியது.
ஆட்சி ஆரம்பத்திலேயே நாட்டில் அதிக அரச வருமான பற்றாக்குறை இருந்த போது பாரிய நிறுவனங்களில் 800 பில்லியன் ரூபா வரித் தொகையை குறைக்க ஜனாதிபதி எடுத்த முடிவு, நிதிக் கட்டுப்பாடு தொடர்பான கடுமையான தவறான முடிவு என்று குற்றம் சாட்டப்பட்டது.
இதேவேளை, 2020ஆம் ஆண்டின் முற்பகுதியில் உலகம் முழுவதும் பரவிய கோவிட் தொற்றை நிர்வகிப்பது தொடர்பில் ஜனாதிபதியும் அரசாங்கமும் வெளிப்படுத்திய விஞ்ஞானப்பூர்வமற்ற பார்வையினால் நாடுமுழுவதும் தொற்றுநோய் பரவுவதற்கு காரணமாக அமைந்ததாகவும் பொருளாதாரம் ஒரு தீவிர நிலைக்கு வீழ்ச்சியடையும் எனவும் குற்றம் சுமத்தப்பட்டது.
இந்த நெருக்கடிகளுக்கு மத்தியில் பாதுகாக்கப்பட்ட இலங்கையின் விவசாயத்தை முற்றாக அழிக்கும் தீர்மானத்தை எட்டிய ஜனாதிபதி, அனைத்து இரசாயன உரங்களையும் தடை செய்வதற்கான தீர்மானத்தை எடுத்தார்.
அதேவேளை, நாட்டின் பொருளாதாரம் வீழ்ச்சியடைந்து வெளிநாட்டு கையிருப்பு பற்றாக்குறையை எதிர்கொண்ட போது, இலங்கை படிப்படியாக கடன் தரவரிசையில் கீழே விழுந்தது.
அதேநேரம், அரசாங்கத்திற்கு எதிரான பொதுமக்கள் போராட்டம் மாபெரும் மக்கள் போராட்டங்களாக மாறி நாட்டின் பல்வேறு மாகாணங்களில் இருந்து வெளிப்பட ஆரம்பித்தது.
நாடு முழுவதும் எரிவாயு மற்றும் எரிபொருள் மட்டுப்படுத்தப்பட்டபோது, அத்தியாவசிய உணவுப் பொருட்களுக்கு தட்டுப்பாடு ஏற்பட்டு, அனைத்துப் பொருட்களின் விலையும் நாட்டின் பெரும்பான்மையான மக்களால் தாங்கிக் கொள்ள முடியாத அளவுக்கு உயர்ந்தபோது, பொதுமக்கள் எதிர்ப்பு போராட்டமாக வளர்ந்தது.
-(3)
