செய்திகள்

சென்னையில் பள்ளி சுற்றுச்சுவர் இடிந்து 2 மாணவிகள் பலி

சென்னை பெசன்ட் நகரில் உள்ள தனியார் மேல்நிலைப்பள்ளியின் சுற்றுச்சுவர் இடிந்து விழுந்ததில் இடிபாடுகளுக்குள் சிக்கி 2 மாணவிகள் உயிரிழந்தனர். காயமடைந்த ஒரு மாணவி சிகிச்சைக்காக மருத்துவமனையில் சேர்க்கப்பட்டுள்ளார்.

இந்நிலையில், உயிரிழந்த மாணவிகளின் குடும்பத்திற்கு தலா மூன்று லட்சம் ரூபாய் முதலமைச்சரின் நிவாரண நிதியிலிருந்து வழங்க தமிழக அரசு உத்தரவிட்டுள்ளது.

இதுகுறித்து அரசு செய்தி குறிப்பில் தெரிவிக்கப்பட்டுள்ள அறிவிப்பு விபரம்:

சென்னை, அடையாறு, பெசன்ட் அவென்யூவில் உள்ள தனியாரால் நடத்தப்படும் அவ்வை ஹோம் டி.வீ.ஆர் பெண்கள் மேல்நிலைப்பள்ளியில் இன்று (13.4.2015) மதியம் 12.30 மணியளவில் சுவர் இடிந்து விழுந்ததில், ஊரூர்குப்பம் பகுதியிலிருந்து அப்பள்ளியில் எட்டாம் வகுப்பில் படிக்கும் நந்தினி, மோனிஷா மற்றும் சந்தியா ஆகியோர் விபத்தில் சிக்கி காயமடைந்தனர்.

காயமடைந்த மாணவிகள் அடையாறிலுள்ள தனியார் மருத்துவமனைக்கு உடனே கொண்டு செல்லப்பட்டனர்.

இதில் மாணவியர் நந்தினி மற்றும் மோனிஷா ஆகியோர் ஏற்கனவே மரணம் அடைந்துவிட்டனர் என்று மருத்துவமனையில் அறிவிக்கப்பட்டு, அவர்கள் உடல்கள் பிரேத பரிசோதனைக்காக இராயப்பேட்டை அரசு மருத்துவமனைக்கு உடனே அனுப்பி வைக்கப்பட்டது.

காலில் பலத்த காயமடையதுள்ள சந்தியா என்ற மாணவி உள்நோயாளியாக அடையாறிலுள்ள தனியார் மருத்துவமனையில் சிகிச்சைக்காக அனுமதிக்கப்பட்டுள்ளார்.

இந்த துயர சம்பவத்தில் உயிரிழந்த மாணவியர் நந்தினி மற்றும் மோனிஷா ஆகியோர் குடும்பங்களுக்கு முதலமைச்சரின் பொது நிவாரண நிதியிலிருயது தலா 3 லட்சம் ரூபாய் வழங்க தமிழக அரசால் உத்தரவிடப்பட்டுள்ளது.

மேலும், தனியார் மருத்துவமனையில் மேல் சிகிச்சைக்காக அனுமதிக்கப்பட்டுள்ள மாணவி சந்தியாவின் முழு மருத்துவ செலவினையும் தமிழக அரசே ஏற்றுக் கொள்ளும்.

முதற்கட்டமாக ரூ.30,000 தமிழக அரசால் மருத்துவமனைக்கு செலுத்தப்பட்டுள்ளது.

இதனிடையே, விபத்து நடந்த இடத்தில், மாநகர காவல்துறை ஆணையர் ஆய்வு மேற்கொண்டார்.