செய்திகள்

மகிந்த மீண்டும் போட்டியிட முடியுமா? ஜே.வி.பி.யும் நீதிமன்றம் செல்கின்றது

ஜனாதிபதி தேர்தலில் தன்னால் மூன்றாவது தடவையாகவும் போட்டியிட முடியுமா என்பது தொடர்பில், ஜனாதிபதி மகிந்த ராஜபக்ஷ, உயர்நீதிமன்றத்திடம் கோரியமையை எதிர்த்து மக்கள் விடுதலை முன்னணி, நாளை வெள்ளிக்கிழமை மனுவொன்றை தாக்கல் செய்யவுள்ளது.

ஜனாதிபதி மகிந்த ராஜபக்ஷ மூன்றாவது தடவையாக போட்டியிடுவதை தனது கட்சி எதிர்ப்பதாகவும் ம.வி.மு.யின் நாடாளுமன்ற உறுப்பினரான விஜித்த ஹேரத் தெரிவித்தார்.

இதன்படி எமது கட்சியின் சார்பாக சுனில் ஹந்துன்நெத்தி எம்.பி நீதிமன்றத்துக்கு வழங்குவதற்கான மனுவை தயார்செய்வார் என்றும் தெரிவித்தார்.

இதேவேளை ஜனாதிபதி மகிந்த ராஜபக்ஷவுக்கு மூன்றாவது தடவையாகவும் ஜனாதிபதி தேர்தலில் போட்டியிட முடியுமா இன்றேல் முடியாதா என்பது தொடர்பிலான வியாக்கியானம் உயர் நீதிமன்றத்தால், திங்கட்கிழமை அனுப்பிவைக்கப்படவுள்ளது.

அரசியலமைப்பின் 18ஆவது திருத்தத்தின் பிரகாரம் மற்றுமொரு தடவை தேர்தலில் போட்டியிடுவதற்கு இடையூறு இருக்கின்றதா என்பது தொடர்பிலான உயர்நீதிமன்றத்தின் வியாக்கியானத்தை எதிர்வரும் 10ஆம் திகதிக்கு முன்னர் அறிவிக்குமாறு ஜனாதிபதி மகிந்த ராஜபக்ஷ, உயர்நீதிமன்றத்திடம் கோரியுள்ளார்.

இதுதொடர்பில் உயர்நீதிமன்றத்தின் பதிவாளர் எம்.எம். ஜயசேகர இலங்கை சட்டத்தரணிகள் சங்கத்தின் தலைவருக்கு நேற்று புதன்கிழமை கடிதமொன்றை அனுப்பிவைத்துள்ளார்.

இதன்படி சம்பந்தப்பட்டவர்கள் இந்த விடயம் பற்றிய எழுத்து மூலமான தமது வாதத்தை நாளை வெள்ளிக்கிழமை பி.ப 3.00 மணிக்கு முன்வைக்கும்படி கோரப்பட்டுள்ளது.