நெஞ்சே எழு 11 – தவறவிடும் தவறுகள்

குற்றத்தை செய்துவிட்டு ஒப்புக்கொள்ள மனமில்லாமல் மனதுக்குள் எப்போதும் சஞ்சலப்படுபவர்கள் சிலரும் உண்டு. பலரின் முன்னிலையில் குற்றத்தை ஒப்புக்கொண்டுவிட்டால் தாங்கள் எல்லோராலும் குற்றவாளிகளாகவே பார்க்கபபடுவார்களோ, தங்களை தாழ்வாக மதிப்பிட்டுவிடுவார்களோ, என்ற மனநிலையே அவர்களை வாட்டும். குற்றமில்லாத நெஞ்சம்தான் எப்போதும் அமைதியாக இருக்கும்.

‘பிறரது குற்றங்களைப்பற்றி ஒருக்காலும் பேசாதே, அவை கெட்டவையாகினும் சரி, அதனால் யாதொரு பயனும் விளையப்போவதில்லை. ஒருவனுடைய குற்றத்தைப்பற்றிப் பேசுவதால் அவனுக்கு ஒரு நாளும் உதவிசெய்தவனாகாய், நீ அவனுக்கு கேடு விளைவிக்கின்றாய், உனக்கு கேடு விளைவித்துக் கொண்டிருக்கின்றாய், உனக்கும் கேடிழைக்கின்றாய் என்றார் சுவாமி விவேகானந்தர்.

நான் இப்போது தவறு செய்துவிட்டேன். ஆனால் நான் செய்த இந்தத்தவறில் இருந்து பல படிப்பினைகளை கற்றுக்கொண்டுவிட்டேன். இனிமேல் இது போன்ற தவறுகள் ஏற்படாதபடி என் வாழ்க்கையை அமைத்துக்கொள்வேன். இப்படி பெரும் தன்மையுடன் தமது குற்றங்களை ஒப்புக்கொள்வதற்கு ஒருபோதும் தயங்குதல் கூடாது.

நீங்கள் செய்யும் எந்தக்குற்றத்திற்காகவும் சந்தர்ப்ப சூழ்நிலைகளை காரணம் காட்டிக்கொண்டிருக்காதீர்கள்.
நீங்கள் செய்யும் குற்றகளை பலர் தெரிந்துகொள்ளாதபடி பார்த்துக்கொள்ளலாம். ஆனால் நீங்கள் செய்யும் சிறு குற்றத்தைக்கூட உங்கள் மனச்சாட்சியிடமிருந்து ஒழித்துவிடமுடியாது. மனச்சாட்சியே உங்கள் குற்றங்களை நீங்கள் இறக்கும் நாள்வரை உங்களுக்குள் இருந்தே உங்களை வாட்டியவண்ணம் இருக்கும்.இனியேனும் சிறு குற்றமோ, அல்லது மகா பாதகமோ? குற்றம் என்று தெரிந்தவுடன் அதை ஒத்துக்கொள்ளுங்கள் மனம் மலர்வதையும், உங்கள் வாழ்க்கை செம்மைப்படுத்தப்படுவதையும் காண்பீர்கள்.

குற்றங்கள் எதுவும் செய்யாத மகாத்மாக்கள் என்று இந்த உலகத்தில் இருப்பவர்கள் இருவர்தான் ஒருவர் இறந்துவிட்டார் இன்னொருவர் இன்னும் பிறக்கவில்லை என்கின்றது ஒரு தத்துவம். இங்கு யாரும் 100 வீதமான உத்தமர்கள் இருக்கவில்லை இருந்துகொண்டும் இல்லை என்பதே யதார்த்தம். 

தாம் குற்றம் புரிந்துவிட்டோம் என்ற மனநிலை பல தற்கொலைகளுக்கும் தூண்டுதலாக இருந்திருக்கின்றமையினை பல தோல்விகளின் நிமித்தம் தற்கொலை செய்துகொண்டவர்களின் செய்திகளை படிக்கும்போது புரிந்துகொண்டிருப்போம். 

இந்த உலகத்தில் நாம் மூக்கின் மேல் விரலைவைத்து பிரமித்துப்பார்க்கும் சாதனையாளர்கள் ஒவ்வொருவரும் ஏதோ ஒரு கட்டத்தில் தவறுகளை புரிந்தவர்கள்தான், ஆனால் அவர்கள் இன்று முன்னேறி நிமிந்து நிற்பதற்கான காரணங்கள், தமது தவறுகளை நினைத்து வருந்திக்கொண்டிருக்காமல், தைரியமாக மன்னிப்புக் கேட்டுவிட்டு, தமது தவறை திருத்திக்கொண்டு வாழ்க்கையில் முன்னேறியவர்களே..

தவறுகளின் சிகரம் என வர்ணிக்கப்படுபவர் தொமஸ் அல்பா எடிசன் அவர்கள், தனது ஆராட்சிகளின் போது பல தவறான வழிமுறைகளில் பல தடவைகள் மிகப்பெரிய தோல்விகளை சந்தித்தவர். இத்தனை தவறான ஆராட்சிகள் ஏன் செய்தீர்கள் என கேட்டபோது, அத்தனை தடவையும் சரியானதை விட்டு தவறான ஆராட்சிகளை இப்படி செய்யக்கூடாது என்ற தகலை தான் கற்றுக்கொண்டதாகவும். தவறுகளின் மூலம் தான் தவறாமல் பாடம் கற்றுக்கொண்டதாகவும் சொல்லியிருந்தார். அதனாலேதான் மிக பெறுமதியான அவது ஆய்வுகூடம் தீப்பெற்றி எரிந்துகொண்டிருக்கும்போது கூட, ஆய்வுகூடம் மட்டும் அல்ல என் தவறுகளும் சேர்ந்தே எரிகின்றது என்றார்.